要數特區政府最惹火官員，教育局局長吳得掂一定上榜，好多政界中人都鍾意向佢開炮，新民黨副主席田北辰噚日出席書展一講座時亦因為英中問題怒插吳得掂，唔知係咪因為咁，搞到吳得掂之後急急撰文解畫。
指唔使「落車」會出事
曾任語常會主席嘅田二少一向對教育嘢好上心，佢噚日解釋力推母語教學係同自己讀拔萃男書院、用英語教學有關，「嗰時我全級100人考70幾名，物理、生物全部用英文教，（只能）靠死記硬背」，又話當時理科老師英文咬字唔準，要求老師解釋乜嘢係地心吸力時對方竟然答：「佢答我why why why, why the sky is so high。」
佢話之後被送到美國讀書後成績大躍進，全級仲考到第3，「唔係我聰明咗，係我終於學番7年嚟聽唔明老師講嘅嘢」，因為老師係用佢哋母語教書，所以佢覺得母語教學好重要。田二少又向吳得掂開火，話佢早前決定未來6年中學教學語言微調政策不變，竟然放過三分一唔符合水平嘅英文中學、唔安排佢哋變番中文中學，「政府咁樣做，家長、英中最開心，但將來會嚴重出事」。
唔知係咪見到二少着咗火，吳得掂其後喺教育局網頁《局中人語》就「微調中學教學語言第二周期的安排」撰文，話需要再交代外界一啲誤解或疑問，強調教育局檢視後認為學校推行嘅教學語言安排開始扎根，學生可以受惠於教師嘅教學經驗同校本支援措施發揮的效用，若貿然因為「學生能力」嘅預設條件，而要求學校2016至2017學年開始改變教學語言安排，非但不能照顧學校同教師需要、亦影響校本教學語言安排成效喎。
李八方
mailto:[email protected]