各大黨派中人都話今個暑假忙到癲，梗係啦，區議會選舉在即，唔勤力一啲，都有可能議席不保，所以未到倒數階段都要全力做嘢。之前花生友都寫過㗎，呢次區選嘅另一個重要影響，係關乎新界東立法會補選嘅出戰人選，事關阿爺都會睇區選成績定出戰策略，包括由乜人代表建制派擔大旗。雖然民建聯同工聯會盛傳都有意派人喺補選試腳，花生友卻聽聞，隨時有位專業人士以黑馬姿態跑出。
眾所周知，泛民主派嘅補選出戰代表，幾乎篤定係公民黨嘅楊岳橋大律師，希望佢可以成功接棒湯狀，保住新東一席不失。假若民建聯同工聯會派人出戰，相信都肯定唔會係楊岳橋式嘅專業人士，好似坊間傳過嘅陳勇同吳秋北咁吖，點睇都似地區人士多過專業啩？所以就算佢哋出戰，都係同楊岳橋各自各搶所屬陣營嘅票，換言之，選舉結果都唔多會令人意外，即係泛民力保優勢不失、建制派嘅候選人旨在參與，谷吓知名度都當贏咗。
吖，花生友最近聽聞，建制派內都有人認為，與其輸住咁去參與補選，點解唔諗吓可行嘅突圍方法，包括以專業鬥專業？尤其新界東，多年輕中產，如果佢哋唔係泛民支持者、撐袋住先又反拉布，雖然唔會投畀楊岳橋，但未必喜歡傳統建制陣營嘅地區人士，如果建制換咗人，可能就令呢批人投票意慾大增，甚至吸納中間溫和派。聽落，係咪好似有啲機會同泛民搶客？據聞建制派都物色緊合適嘅專業界別人士上場，大打專業戰，想一刷建制派嘅土味。如果嫌男鬥男唔夠好睇，如果搵件女專業人士大戰楊岳橋，唔知大家又點睇？
花生友