有時都真係不得不佩服政務司司長林鄭月娥，搞完政改又要專責鉛水風波，8月仲要搞全城清潔運動，公務纏身嘅林鄭月娥卻冇乜嘢怨言，林鄭噚日仲連踩兩場同上述議題都冇關嘅公開活動。
為皇馬訓練營致辭
林鄭噚日朝早就入咗沙田，出席有關可持續發展嘅研討會，之後一到晏晝，則去到位於將軍澳嘅單車館，為「皇家馬德里基金會青少年專業訓練營」嘅開學禮致辭。
似乎細路仔都係大人嘅動力來源，現場所見，林鄭見到嘅細路學員時好開心，露出政改後難得嘅燦爛笑容，盡顯奶媽本性。
佢話政府一直致力推動體育發展，鼓勵全民積極參與體育運動，期望呢次訓練可以為香港發掘同培養更多有潛質嘅球員。據知林鄭短期內唔會放假，留守香港拆彈。