證監會前行政總裁（CEO）韋奕禮認真陰功豬呀，佢3、4年前過檔英國金融行為監管局（FCA）任CEO，點知忽然「被辭職」，全因英國財相歐思邦一句話要FCA邁向另一個新階段！
好在佢份合約包12個月通知期，所以出糧出到明年7月，佢上年度袋70萬英鎊，市場估佢未來一年袋住呢個數走。
韋奕禮原本任期到明年3月，歐思邦上周落實唔同佢續約；韋奕禮今年9月就會轉任顧問，直至明年1月離開。
歐思邦解釋，英國需要嚴謹嘅金融監管機構，但呢個階段已經結束，政府需要不同嘅人帶領FCA向前走，不過明眼人都知呢個唔係真正原因。
有人就話韋奕禮樹敵太多；舊年FCA又有職員洩漏份監管報告，令當地保險股市值唔見42億美元，包括歐思邦在內嘅政府官員早已睇韋奕禮唔順眼咁話。