「一係唔做，一做就要做最大。」PayPal創辦人Peter Thiel舊年出版嘅《Zero to One》提到，初創與其跟行業龍頭「硬碰硬」，不如找個百分百獨有發展空間，目標就是由零做到壟斷，只係失敗者先日夜聚焦爭鬥。
由零做到壟斷嘅企業，蘋果公司絕對係代表。最近一項有關全球智能手機的市場調查，證明完全競爭市場下，所有利潤都被競爭者吞噬。調查話今年首季全球8間智能手機生產商合計經營利潤，iPhone已佔九成二。
蘋果公司成功之處，歸功開創產品獨特性，仲要唔止iPhone。蘋果公司上個星期三推出新一代iPod Touch，雖然好多用戶都轉用智能手機，以網絡串流聽歌，令iPod銷售平均每年跌25.2%。
但蘋果產品生態系統夠撐新一代iPod Touch發展前景。新機採用iPhone 6一樣A8晶片、支援WiFi同Apps。部份功能同iPhone睇齊，例如Apple Music、Face Time或者傳短訊iMessage。最緊要係新機增設800萬像素鏡頭，即係iPhone冇電，拎部iPod Touch影相亦得。
美股踏入業績期，本周重頭戲係21號放榜嘅蘋果公司，預期受惠iPhone 6效應下令公司第3季業績有驚喜。普遍分析員就睇淡Apple Watch銷情，估計只賣出400幾萬隻。
C+B
本欄逢周一刊出