好事成雙！港產F1蓮花實習車手方駿宇（Adderly），繼上月喺GT亞洲系列賽日本岡山站第四回合贏得今季首個冠軍後，呢位90後車神噚日返回「福地」日本，喺富士國際賽車場上演嘅第六回合，又贏多次冠軍！
Darryl登車手榜首位
方駿宇雖然上禮拜六出戰第五回合失利，首圈因與對手碰撞被罰30秒，僅獲13名，但未有影響心情，噚日出戰第六回合更一吐烏氣。呢位25歲港將由第九位一直追上嚟，最終夥拍日籍隊友澤圭太，再次力壓排頭位出賽嘅歐陽若曦（Darryl），代表賓利絕對車隊贏得冠軍。至於揸檸檬茶戰車嘅Darryl，效力嘅Craft Bamboo車隊雖則只得亞軍，但卻進佔車手榜首位，真係犀利。
Adderly賽後話︰「車隊好勤力及時整番好架車，所以我今場起步唔錯，第四、五個彎上到第二。雖然『檸檬茶』好快，但因為我哋為今場賽事，準備咗兩套車胎，戰術得宜下，去到最尾都過到佢。」下一站賽事將會喺九月四至六號，喺馬來西亞雪邦國際賽車場上演。