沙田翠湖花園嘅2.6億元天價維修工程嘅圍標貪污案，廉署已拘捕包括法團主席、管理公司高層等人士。民主黨總幹事林卓廷一直參與「反圍標大聯盟」工作，佢同八方講早前翠湖花園業主立案法團副主席畀信佢，話法團喺2013年1月底同佢見面後，「參照你的高見，公開招標」，仲話「翠湖能落實推行大維修工程，你提供的意見居功至偉」，之後提及圍標案細節，奉勸林認清事實，似乎暗示阿廷一手搞出風波。阿廷澄清3年前工程諮詢階段曾警告法團，工程有圍標風險，當日法團成員不置一詞，結果大家有眼見，佢自言法團將責任推畀佢，仲形容「居功至偉」，十分荒謬，叫對方反省，而非將提出質疑嘅人視為敵人。