完美奸人鄭子誠自幾年前成為高登男神後，最近又再現100毛電視受追捧，「鄭子誠現象」，已成為689主政時代的精神面貌代表。反映市民對政府及特首的低度信任，689之政治形象猶如鄭子誠，總之一出現，觀眾就認定佢有不可告人嘅陰謀，越笑就越係有奸計。
「鉛水門」一開波就試圖隊死水喉匠林德深，立即引起坊間陰謀論，咁大單點可能會由燒焊工匠孭，而且政府仲係一反常態，乜都未查就公佈水喉匠名字，試圖將危機控制在最低Level。但正因為大家早已認定689是鄭子誠，一定有Hidden agenda，要包庇總承建商中國建築，所以火就越燒越烈，加上署長連總承建商個名都唔敢提，就更加證明有陰謀。而689上京後公開發表「冇證據顯示同承建商預製組件有關」，佢唔講由自可，一開口外界就視為進一步證明佢要包庇中國建築。而咁巧合親建制媒體想轉移目標，攻擊揭發事件之黃碧雲，新聞統籌專員馮煒光加入戰團，化身鍵盤戰士對付黃碧雲，外界當然認為馮專員是689授意搞政治鬥爭，在如此拙劣手法下，本來一件本地民生事件，在官民低信任狀態下，迅速變成中港矛盾。幸好張炳良總算還有些少政治智慧，知道不能迴避中國建築問題，而最後政府被迫委任由法官主持獨立調查委員會救火。其實呢招早就應該出，而唔應該將民生事務視為政治鬥爭，對付泛民、保衞國企，將香港幾十年累積下來的理性、文明決策變成政治鬥爭掛帥。
第二個「鄭子誠陰謀」，其實仲過癮，就是自導自演畀自己睇嘅群星拱照連任Show。在立法會答問郭榮鏗提問是否連任時支吾以對，跟手上電台就公開話現時冇連任想法，隔日就上京見人大委員長張德江，見完後同記者講足五次中央領導人高度讚揚及肯定自己表現，然後就話有機會、空間會再服務香港巿民。整個劇本鋪排有晒起承轉合，先扮唔想選，但由於中央高度肯定，所以惟有再度上陣。但整套戲最後露出馬腳變成示威不成反示弱，因為新華社發稿刪除了「高度肯定」，689變成自吹自擂獨腳戲。
一出現就一定有陰謀
求見張德江做唔到預期效果，正因為太假，上京前話傾一帶一路，上到去根本冇任何重要部委見佢，更好笑是那邊廂習握手上演後，689公開表示乃一般禮節，冇微言大義，但另一邊就急於上京「取暖」，呢種姿態看在建制派眼裏，大家掩住嘴笑。如果習握手真係冇料到，又何須咁急訪京為自己造勢呢？
鄭子誠現象之可笑，在於無論佢扮演甚麼角色，看在公眾眼中，都是奸角有陰謀，鉛水也好、創科局也好、會見中央官員也好，總之一出現 ，就一定有陰謀！689如果有自知之明，就應早早效法佢領導董建華，在2003年七一後低調消失於公眾視野之中。
添馬男