剛季新勝馬上名率逾四成，難怪好多馬迷都鍾意賭贏開嘅馬，貪佢夠穩陣。不過，新勝馬有時亦會成為投注陷阱，其中莫雷拉接手勝後再出馬，更是高危一族。
上季共有686駒贏完再出，交出114冠97亞79季，勝出率及上名率分別高達16.6%和42.3%，所以追捧新勝馬成為唔少馬迷嘅贏錢方程式。不過「水能載舟，亦能覆舟」，勝後再出馬亦隨時令人損手，只要大家識得走位，避開唔穩陣嘅新勝馬，自然更加可以提高贏錢機會。
莫雷拉貴為冠軍兼最受歡迎騎師，騎功當然了得，亦有唔少馬匹在佢胯下贏完又贏，如「澳斯卡」、「步步友」及「威爾頓」等，不過要留意以上馬匹都係佢贏開繼續贏，反而一些由其他騎師贏完換莫雷拉接手之新勝馬，原來屬高危一族，上季15匹同類份子，僅「京城珍寶」能順利連捷，其餘俱與頭馬無緣，最慘係不少係一面倒大熱，如「和順超影」、「華恩庭」、「紅白」及「飛廉之子」不足兩倍全熱門倒灶，後駒更是近十年唯一熱至1.2倍連P都冇嘅馬匹，看來這類馬不宜過信。