渣打（2888）近年業績麻麻，管理層全部要孭飛，震到多位高層走晒，包括前行政總裁（CEO）冼博德、兩位大區域CEO白承睿與尚卡爾；主席莊貝思都要明年走，留低嘅管理層亦唔多穩陣。
話說新任渣打CEO溫拓思（Bill Winters）上任後，積極簡化管理架構，包括要7大業務區域阿頭直接向佢滙報，夾喺中間嘅管理層自然被架空，講緊嘅係副行政總裁李亦思（Mike Rees）。
其實Rees舊年年初先至升做𠵱家呢個位，叫做坐暖咗一陣，原本樓下全部區域總裁都係向佢滙報，但𠵱家身邊嘅同事一個又一個咁走咗，新老闆又好鬼hands-on，要求區域阿頭直接向佢滙報，難怪英國《金融時報》新近有報道話唔知Rees可以留低幾耐。