正所謂「輸人唔輸陣」，雖然競選連任行情近期被看淡，唔少人覺得政改過唔到關，中央都未必再支持特首梁振英2017年冧莊。但CY份人幾咁有決勝心，2012年特首選舉，大家都見到㗎嘞，佢啲「粉絲」似乎同佢一樣好有「毅力」，提早兩年幾幫佢造勢連任。
一個名為「支持特首組織Support Cy Leung」嘅團體噚日下午就喺北角港鐵站外擺街站（圖），向市民派500個齊心襟章同心意卡，話要收集市民對CY嘅祝福，想喺CY下月12號生日嗰日送畀特首賀壽。與此同時，CY亦喺佢個人網誌撰文，話上周日訪京時，同廿幾個參與工作實習計劃嘅香港大學生見面交流，部份人期待見識內地資訊科技嘅發展，亦有學生期待喺內地實習得到更多啟發，總之係唱好國家。