港鐵（066）候任主席馬時亨自2008年因病離開官場呢個熱廚房後，生活寫意，目前擔任港鐵、農行（1288）等幾間上市公司嘅獨董，閒時出席講座擔任演講嘉賓，身形正常番晒，唔講都記唔起佢曾經有「肥馬」呢個花名。
一講到食，佢笑住話，香港地實在有太多食肆，花款又多，兩個寶貝女又不時帶佢兩公婆去試新餐廳，所以家陣要佢搵一間去完又去嘅餐廳真係好難。佢打趣話自己「唔似大劉（華置（127）大股東劉鑾雄）可以日日去福臨門」！
不過，由於佢喺蘇豪區有個單位，所以佢每個星期起碼會去一次中環Oolaa食早餐，Oolaa出名氣氛舒服悠閒，多外國人幫襯，賓尼迪蛋亦做得十分出色。
馬時亨每次去到必定會嘆一杯Regular coffee with hot milk（40元），至於早餐選擇就次次不同，視乎當日心情與喜好。佢最鍾意呢間餐廳嘅氣氛。
的確，呢間餐廳嘅室內佈置好有家居感覺，落地玻璃讓陽光輕透入內，平時經常有外國人喺度嘆咖啡閒聊，身處其中，好容易以為自己坐喺巴黎嘅咖啡店，分別只係呢度係室內有冷氣！希望佢擔任港鐵主席後還有呢種閒情逸致喇。
記者：高淑嫻