迪亞高哥斯達（DC）識穿過鐵絲網入場練波，點解嘅？又識將架車由紅變藍，好犀利呀！呢啲都係廣告特技得啖笑，但當英超爭標對手密密增兵，車路士領隊摩連奴就話不變應萬變。如果佢再施「摩」法靠「地莊」衞冕，我求大俠到時都要高八度講番句：好神奇呀！
DC玩魔術sell波衫
車仔大軍已經到咗加拿大開操三日，但佢哋首場國冠盃要周三先踢，難怪禮拜日練波鬼咁輕鬆，最忙反而係瘋狂拍廣告嘅DC。為咗sell今季新衫，佢先扮操練遲到，對住鐵絲網「狗衝」埋去，即刻除剩成套新波衫；另一條片見佢同艾斯派古達扮去停車場大整蠱，DC對住架紅色車一掀，架車就甩咗層皮變做藍色，當夏薩特落車鼓譟，艾斯派古達就揮揮魔棒喺車頭加個隊徽，三位隨即發出震撼性嘅歡呼，都幾好笑。
不過，摩佬同愛華頓主帥馬天尼斯對罵就激動得多。車仔想斟拖肥21歲守將史東斯做泰利接班人已經係公開嘅秘密，首次報價被拒後再加碼至2,600萬鎊，搞到馬帥炮轟備戰受到影響：「有球會喺傳媒度好公開咁表態，我唔覺得呢種係愛華頓嘅做事方式。我哋唔會公開談論其他球會嘅某位球員。史東斯𠵱家係愛華頓嘅人，講完！」要摩佬「打嘴炮」真係未驚過，呢次佢就玩捉字蝨：「佢哋講緊『唔接受呢次出價』，唔係『任何出價』。我哋又冇喺九月二號或者對愛華頓前兩日出價。」
明寸勁敵瘋狂掃貨
喺另一個訪問，摩佬仲發表轉會偉論，話只鍾意一對一增兵，好似搵比高域頂施治、法卡奧代杜奧巴，明寸勁敵瘋狂掃貨：「我唔能夠阻止佢哋買人，亦唔關心。呢季我哋講緊『睇吓史達寧值呢個價錢！』但下季只會更衰，到時有人會畀6,000萬鎊。足球就係咁，一季出現咗財政公平條例，下季就會有方法繞過佢。我哋只有一個機會衞冕：以原班人馬踢得更好。」
摩佬口痕上嚟，連轉會紅人保羅普巴躺着也中槍：「我諗每個人都對普巴有興趣，但有啲嘢你做得到，有啲嘢你做唔到；正如我鍾意艾菲爾鐵塔，但我唔可以喺後花園擁有佢。」其實沒有誰比誰高尚，過去半季以借將身份效力費倫天拿嘅穆罕默德沙拿唔肯留低，但車仔已經收咗新一筆續借費；結果英媒話沙拿應承咗借去羅馬，羅馬就借迪斯度畀費倫補數，車仔同時吼實羅馬20歲「𡃁」仔阿利斯奧羅馬洛尼。
識睇，一定係睇足英台【英波Live】：
http://soccer.appledaily.com
http://bit.ly/engballlive