香港不敗拳王曹星如，再次為拳賽延遲蜜月，今次係為咗下月29號喺香港舉行嘅一場10回合腰帶戰（見附表）。點講都好，都要多得身邊一位體貼嘅靚老婆阿嵐！兩口子今年一月二號拉埋天窗，但為咗三月比賽延期度蜜月，本來諗住前晚一戰後去日本補數，但殺出下月底香港站比賽，蜜月惟有再度延期，好彩有老婆支持！
fb貼恩愛相爆Like
星如噚日同過澳門支持自己嘅老婆一齊食完午餐後，即刻post張撐枱腳相喺fb，仲寫住：「比賽完，與至愛的人分享至愛的食物，幸福又滿足」，不足一小時已有2,000個Like。有網友留言話：「曬死人喇！」估唔到擂台上出擊勁、狠、準嘅星如，擂台下都有柔情一面。
講到蜜月一延再延，星如話：「其實都想去日本度蜜月，但有香港站比賽，感覺𠵱家去會太趕，又驚蜜月期間食到變肥仔，影響之後訓練。」除咗八月嘅香港站，星如亦計劃11月出戰世界冠軍前哨戰，贏咗嘅話就可以挑戰世界冠軍金腰帶，若然真係成為香港拳擊世界冠軍，相信太太都唔介意蜜月一延再延啩。
休息三天開始復操
講番上周六喺金光綜藝館嘅「威尼斯人爭霸戰」，星如喺第四回合技術性擊倒（Technical Knock Out、T.K.O.）泰國對手威沙烏，取得職業生涯17連勝，仲要冇俾對手打中面部，保住靚仔樣；星如話賽後嗰晚大約凌晨兩點幾瞓，朝早起身後感覺食咗對手幾拳嘅腹部有啲痛。雖然經理人劉志遠（Jay）放星如一個星期假，但星如話：「我休息兩、三日就會開始跑步，下星期開始練習。講真，我𠵱家無論身、心都要預備好下月底嘅香港站比賽。」
Jay表示香港站比賽詳情將於今日公佈，暫時只可以公佈呢場係星如職業生涯第18戰嘅比賽，會喺灣仔會展舉行，亦係星如闊別香港兩年幾後，再次重返香港拳壇，屆時會係佢首次對澳洲拳手，雙方進行10回合嘅腰帶戰，星如話：「真係好期待香港呢場比賽，希望打一場精采嘅拳賽畀香港拳迷睇。」