上星期聽外匯專家W講貨幣走勢，聽咗一輪，左丁山蠢蠢地都聽得出一個結論，就係美元一枝獨秀，我地嘅港元與美元掛鈎，亦都水漲船高，香港人出外旅行，銀紙好見使，但外地人來香港，就會叫苦連天，縮窒縮窒，旅遊界生意會分開兩極，辦團出外者笑到見牙唔見眼，迎接外來遊客嘅必定苦口苦面。
外匯W話世界兩大陰霾呢個星期一掃而空，希臘年青總理齊普拉斯玩公投玩死自己，有本地評論員話佢盲拳打死老師傅（即歐盟領袖），實際上佢係盲權打死希臘國民，理應剖腹謝罪，乜唔係啫，公投之後，齊普拉斯重返會議室談判桌，結果俾歐盟領袖圍毆，打到似死狗（like a beaten dog，馬爾他總理如是云），卒之跪地投降，簽城下之盟，玩咗幾個月，最後還是要出售國有資產，削減長俸養老金，緊縮政府開支，斗零債務赦免都攞唔到。激進左派人士只識嗌口號，講意識形態，到咗實務層次，完全不知進退，齊普拉斯係一個好例子。佢嘅前財長華魯法卡斯仲離譜，國難當前居然陪已經移民澳洲嘅女兒去希臘外島渡假，在Twitter講：「我都要有私人家庭生活。」俾希臘人鬧到狗血淋頭，人地平民連糖尿病藥都買唔到（因缺貨），你做過財長，一無建樹，仲講風涼話去渡假？
希臘願簽屈辱協議，留在歐元區，但歐元經此自殘一役，元氣有待恢復，中期內會是弱勢貨幣。至於伊朗與中英美法俄德六國達成限核協議，伊朗可以輸出石油不受制裁，國際油價一定受壓，易跌難升，影響所及，所有以資源為基礎嘅貨幣，如加元、澳元、紐元，外匯W都睇低一線。石油價長期在55美元一桶（或以下）浮沉嘅話，受打擊嘅還有環保團體與再生能源，環保團體一向主張廢除核電，廢除石化燃料發電，發展再生能源，點知油價會跌成咁，全世界財團投資於再生能源嘅話，隨時血本無歸，美國綠色能源行業已經伸大手板，要求聯邦政府延長稅務優惠，甚至直接津貼，否則便關門大吉，德國係富有國家，政府與國民已達成共識，以後徹底放棄核電，以再生能源代替，但因工會反對，仍然不放棄煤電，綜合嘅結果係，德國電費遠遠高過美國及香港，而國民願意接受！香港環保團體就不妨去德國學師考察，講環保而不計及成本，就係希臘激進左派之流。