美國嘅男足雖然現時由德國名宿奇連士文掌帥，但極其量喺世界球壇都只係二線頭嘅球隊；反而佢哋嘅女足就厲害得多喇！啱啱先喺女子世界盃稱后。唔知係咪因為咁，前美國國腳前鋒當路雲就話如果美國女足同男足踢一場比賽嘅話，贏嘅會係女子隊；而美國女足主力好似靚女前鋒雅歷絲摩根等，都對呢場「性別大戰」好有興趣，仲叫男足放馬過嚟㖭！
靚女摩根：放馬過嚟
當路雲係美國著名前鋒之一，而喺日前一個頒獎禮上，佢接受英國《每日郵報》嘅訪問時就話：「我認為喺呢個moment嚟講，如果美國女足鬥男足，贏嘅會係女足，因為佢哋嘅臨門一腳把握較男足好；不過，當然佢哋會喺苦戰下勝出！」當路雲又話：「我有幸喺今屆女子世界盃決賽時現場觀戰，亦都認識咗女隊唔少主力多年，我可以講佢哋近年真係進步好大，我對佢哋嘅成就感到高興。」
對於呢場「性別大戰」，美國女足嘅主力都磨拳擦掌，靚女前鋒雅歷絲摩根就話：「相信呢場會係一場精采嘅比賽，我覺得就算同男足比賽，我哋都會不落下風。」至於美國後衞姬嘉更加話：「我認為我哋會贏，而比數係2:1，因為我哋嘅中前場有啲好似萊德咁嘅好球員，只要有機會，我哋都會成功將個波送入網，呢個係我哋練習同合作多年嘅成果。」
遭奇哥棄用懷恨在心
外界就有唔少人認為當路雲咁講只係因為「酸葡萄」，畢竟33歲嘅當路雲喺2014年夏天俾奇連士文棄用，之後就一直好唔妥奇哥，時不時會借機寸吓奇哥，又踩吓美國男足咁，所以今次當路雲應該都係借題發揮。因為之前美國女足喺啲非正式練習賽度，試過輸俾美國男子大學隊，又輸過俾美國男子U17，所以如果真係同男足比賽，點計都好難贏囉！