15年，黎慧玲仍在尋子。沒有多少人知道她的名字，大家都叫她庾媽媽，只因失蹤智障男童庾文翰，早成了這個慈母人生的全部，「有人話時間可沖淡一切，但對我嚟講，時間越耐越焦急，怕文翰企喺我面前，都唔再認得」。農曆年前接受手術，入院前一晚，她又寫信給習近平，「希望為個仔做埋最後一件事」。15年過去，由江澤民到習近平，中國翻幾番，信仍在寫，「唔係追究，只求真相大白，如果唔係，我死不瞑目。」62歲的庾媽媽說。
記者：呂麗嬋
「以前全國走，家身體唔好，少返大陸，好在科技進步咗，可以網上尋人，上年11月，先有個人話喺深圳見到文翰，傳咗張相畀我睇，證明啲尋人網仲有人會睇」。智能手機，庾媽媽比你我都用得純熟，無看過劉德華的《失孤》，但尋人網「寶貝回家」，每一頁她都如數家珍，「好多人好好心，勸我放低，但我真係做唔到，每次諗到佢流落深圳，唔知點解喺派出所度唔見咗，我就好心痛」。
農曆年前，她體檢時發現近胸肺部位有黑影，懷疑生癌，入院做手術前，她以「人為之災，帶來一生的痛一身的病」為題，寫信給習近平，要求徹查兒子被派出所接收後人間蒸發的真相，密密麻麻的字，填滿三大張紙。類似的信件，她寫了足足15年，由江澤民、溫家寶到今日權傾一時的習近平，堆滿一大箱。物移星換，做房署的丈夫三年前退休、文翰那小一歲的弟弟，也已長大成人。
一直無申請死亡證
「對個細仔係有虧欠，細細個大佬有自閉症，全副心機放喺佢度，佢細個都會怨，你同老竇剩錫晒阿哥，心中只有阿哥，家大個，屋企發生咗咁多事，佢反而肉赤阿媽，怕我放唔低，搞到自己唔開心」。失蹤多年，早過7年大限，一直無為文翰申請死亡證，「我知道係好渺茫，但如果佢真係未死，咁樣好似咒自己個仔咁，我真係唔想。」她幽幽的說。