猶記得喺剛結束嘅英超球季，當時效力利物浦嘅謝拉特成日俾人插，話佢走下坡，講到佢離隊投洛杉磯銀河係「黯然離隊」。好彩謝四冇俾人睇死，喺上周六洛杉磯銀河鬥聖荷西地震嘅呢場美職聯羅省打吡中，喺老婆居倫「監場」同埋好友碧咸捧場之下，謝四就「地標戰」入波，加埋助攻兼博得一記12碼，造就故劍重逢嘅好拍檔前鋒羅比堅尼連中三元之餘，仲協助銀河喺落後兩球嘅劣勢下，以5:2勝出，開出100倍嘅波膽。
羅比堅尼最佳拍檔
謝四賽後話：「我同羅比喺利物浦時已經好有化學作用，佢好聰明，又鬼死咁明白我嘅心意，所以我哋到依家仍然可以合作無間。」值得一提嘅係謝拉特都算重感情，因為喺呢場比賽中，佢仍然係用紅軍嘅護脛比賽，而佢喺賽後仲專登將呢張相upload上自己嘅instagram㖭！