【飲食籽：搵食地圖】
這個獨特的草根天堂，出現了很多奇人異士，既見抓緊機會的生意謀略，也有靈活變通的庶民智慧，憑個人奇技及特質，在這個「平通港九」的競技場，殺出一條血路，是小人物生存韌力的最佳示範。
荔枝女王 擺街做到入舖
桂林街有一名「奇女子」。恩記龍躉大王老闆吳伯恩這樣形容她：「佢係我嘅偶像！佢好有生意頭腦。最初一個人推住手推車喺街邊賣菜，捱吓捱吓，搬入舖賣埋生果、𠵱家仲做埋士多，發個豬頭咁！」這名奇女子叫卿姐，是世紀超級市場的老闆，一頭清爽貼服短髮，粉紅色運動裝，動作敏捷。店位於基隆街及桂林街交界，人流極旺。它雖稱作超市，其實是一間賣糧油雜貨的士多，外邊則是生果及菜檔。同事知道我相約她做訪問，問了一個很奇怪的問題：「究竟呢間舖頭點收舖？」事關舖外的生果蔬菜經常堆到亂七八糟，沒規律可言，但一個個價錢牌插在其中，卻一目了然。「要咁樣先做到生意，我哋流量快，邊有時間慢慢執，賣到深夜，啲貨去得七七八八，用塊布蓋着咪得。」卿姐以低沉的聲線說。
現在正值荔枝時節，攤檔便堆了數座「荔枝山」，有掛綠等數款，由於荔枝山太巨型，經過的人無不注視，大部份客人亦為荔枝而來，店員做到沒停手，密密添貨，荔枝山的高度從未削減。
卿姐為人低調，和她做訪問，基本上是「冇時停」，她一時挑走爛荔枝，一時忙於收銀，惟有向她女兒梁小姐求助。「我阿媽好辛苦，佢嘅成功係因為毅力，以前拎貨、落貨、賣貨一腳踢，起初做走鬼檔，一朝早推架手推車霸位賣菜，夜晚十一點幾收工去學車，車牌都考咗五次先合格，每日瞓兩三嗰鐘。」卿姐接口說：「邊有咁誇張，費事啲人話你作大，都係寫4個鐘算啦！尤其𠵱家年紀大，要瞓至少4個鐘。」
銷量之冠 日賣80籮荔枝
「我哋嘅荔枝又平又靚，我哋認第二，冇人敢認第一，銷量差唔多係全港之冠。其他生果檔會將靚同差嘅品種溝埋一齊，然後賣貴啲，我哋寧願做良心企業，一定唔會咁做。」梁小姐說。早上七時開檔，店內已塞滿數十個荔枝籮，一直賣到凌晨1時。他們每日賣80籮荔枝，一籮有70磅，日賣5,600磅，若以每位客人買3磅計算，單計流量便有約1,800人光顧。
「好多時批發入多咗，便捱義氣要埋佢，人哋下次有好嘢就會預埋你，做人唔可以太計較。」卿姐說。流量大，只因售價實在便宜，荔枝廿元有3磅，極具吸引力。「呢度做生意，轉數要快，我哋係第一間轉型做埋賣生果舖頭。有人流就賺到錢，最緊要平，薄利多銷。不過，𠵱家生意比以前難做好多了。」
世紀超級市場
桂林街91至93號幗寶樓地下
屠龍好手 生劏龍躉騷
每次吳伯恩開壇作法，總會擠滿看熱鬧的人群。他是恩記海鮮的老闆，自封為「龍躉大王」。每日當街表演生劏龍躉，手握重兩斤的「屠龍刀」，日斬最少數條重約40斤的龍躉。他和助手兩人合力把一條龍躉按在地上，再一刀斬落大動脈，魚頭應聲裂開，水花四濺，旁邊觀眾不禁發出「嘩嘩」的驚歎聲。「你估劏龍躉容易呀！龍躉好大力，會四圍走，四圍撞，所以要捉到好實。最梗要係血要放到乾乾淨淨，唔係肉會有腥味。我啲龍躉肉特別雪白，全靠我嘅獨門秘技。」劏龍躉工夫多，不但要把龍躉放在氧氣水中放血，其間要用鹹水沖擦，過程一絲不苟，乾淨利落。
除龍躉肉外，店還將不同部位如腸、扣等分門別類出售，是全港提供最多龍躉的批發商。「你哋可以買幾十蚊試試，比較吓同其他街市檔口有乜分別，完全係兩回事。」他牙斬斬說。他賣的龍躉是印尼及馬來西亞的野生或半野生花尾躉，較內地出產的龍躉大，質素佳，成本較高。他更深入研究如何煮龍躉，像訪問當日，有圍觀者說：「龍躉好難煮，特別麻煩！」他便逐個部位細心講解，有時更七情上面，儼如推銷員般專業。「呢個背鰭位，叫龍躉天九翅，皮像花膠，煙煙韌韌，好食有營養，女士最啱，好過食燕窩。」又說：「龍躉個胃即係扣，有豐富膠質，好爽脆，爆炒後最啱送酒。」
黑道中人轉行賣魚
吳伯恩一生堪稱傳奇，原是黑道中人，後金盆洗手，在北河街街邊賣魚，九十年代入舖開店。「深水埗消費力弱，做海鮮好難發圍，到𠵱家我都係靠區外客為主。起初我主力賣帶子，幾毫子一隻，薄利多銷，好搵過打工。生意漸漸好，才轉賣石斑、油𩺬。」轉捩點在1998年，市面發現蘇眉含有雪卡毒，他反其道而行，轉做貴價海魚批發，以低價入貨，搶去了不少老行家的生意，因而賺到第一桶金，及後買舖投資，除了鉅龍酒家外，還擁有太子四個地舖。「做生意最緊要肯博，我哋呢啲江湖人唔怕死！」現在他每日仍長駐檔口劏魚，風雨不改，事事親力親為。
在街市繞一圈，發現人流最旺的舖頭大多是賣豬肉或生果檔，他透露其經營之道：「以前只要你夠勤力，北河街有的是人流，要賺錢唔難。喺批發市場交界，會剩下不少下欄貨，這些都可以變做錢。有些菜檔寧願將貨平價賣出去，有人幫你搬埋走，賺頭蝕尾，唔使留喺度過夜，對於一間舖運作好有用。」
恩記龍躉大王
桂林街89號地下
記者：何嘉茵
攝影：伍慶泉、劉永發
插畫：麥震東
編輯：李寶筠
美術：黃創泰