【爆相爆片】去年約滿亞視的32歲落選亞姐鄭伊娜，06年入行以來事業發展平平，反而跟趙哲妤因爭仔傳聞令她知名度提升。鄭伊娜今年2月被指介入前中國小姐趙哲妤與半億身家的投資公司老闆Jeff戀情，雖然Jeff最後重投趙哲妤懷抱，但原來鄭伊娜亦不愁寂寞，火速找到新目標。
昨日有讀者透過本報「爆相爆片」爆料，指前日下午6時許在觀塘鴻圖道的阿鴻小吃發現鄭伊娜媾仔。當時鄭伊娜坐在一位打扮老實的四眼佬身旁，四眼佬並拿起相機睇相，本來二人邊睇相邊有講有笑，但突然鄭伊娜從四眼佬身後伸手搶相機，甚至從後揞實四眼佬雙眼，力阻對方睇相，打情罵俏一輪至晚上7時許才離開。
書展後觀塘蜜會
從讀者提供的照片中，見到鄭伊娜挨住四眼佬之餘，更疑似以其33B上圍胸壓對方，二人親密關係盡在不言中。而前日鄭伊娜跟劉俐到書展力撐柯嘉琪出寫真，其身上所穿的白色短裙，正是跟四眼佬約會時所穿同一款式，明顯是出席完書展後跟四眼佬約會。
記者昨日致電鄭伊娜，問她是否跟男朋友到觀塘約會，並公然親熱時，她否認對方是男友說：「朋友嚟㗎。佢搶咗我相機，入面嘅相我唔想佢睇，就揞住佢對眼等佢睇唔到囉。」記者指二人挨在一起舉動親熱，鄭伊娜說：「冇話特別close，睇相近啲好正常啫。」二人可有發展機會？她謂：「唔知㗎，𠵱家係朋友嚟。」鄭伊娜強調現時單身沒有男友，四眼佬亦未有追求自己。
採訪：魯吉
