特首夫人梁唐青儀日理萬機，平時要出席大大小小嘅公開活動，唔搵番個人幫手點得呢？不過似乎特首辦都冇啱心水人選，所以政府噚日出廣告幫梁太聘請行政助理，主要負責協助籌劃、安排宴會同埋社交活動，同埋做梁太嘅秘書，人工介乎3.5萬至3.8萬，𠵱家時勢都算筍工。
呢份工嘅要求唔算好高，基本門檻係有專上院校嘅高級文憑，大學學位優先；喺大型機構做過私人助理或者秘書至少5年；以及良好中、英文寫作能力，流利英語、粵語，識電腦，講到普通話就仲好喇。不過呢份工唔係鐵飯碗，只係2年合約嘅合約工。咁又係，梁振英嘅任期都係得番2年左右啫。