其實簽唔到大牌球星又有咩好怕喎，好似小馬咁，臨門一腳簽唔成D佐敦（DeAndre Jordan），但就可以加人工同忠臣巴里亞（J.J. Barea）續約，𠵱家仲多咗項名留青史嘅紀錄㖭，就係有三位同年同月同日生嘅控衞。
D佐敦反口唔去小馬，今個夏天成為自由身嘅31歲控衞巴里亞就成為陣中其中一個受益人。JJ原本同小馬傾掂，以570萬美元續約兩年，但球隊簽唔成D佐敦張頂薪約後，就變咗開一份四年總值1,600萬美元（約1.2億港元）嘅長約畀佢，平均年薪加咗成百萬。
除咗加人工，JJ嚟緊呢季仲會多個慶生buddy。隊友費頓（Raymond Felton）本身已經同巴里亞一樣，喺1984年6月26號出世；而咁啱早幾日簽約來投嘅迪朗威廉士（Deron Williams），都係呢日生日，即係小馬來季陣中會有三位同年同月同日生嘅控衞。
有精明網民計過數，發現一隊波15位球員入面，要有三個係同年同月同日生，機率只有0.00182%；而呢「三胞胎」都係打同一個位嘅機率，就更加係低到0.00004%！呢個情況唔止係百年難得一遇，而係1,270年先會出現一次！
J史密夫底薪投快艇
另一邊廂，成功爭取D佐敦留隊嘅快艇，周四就簽到前入樽王J史密夫（Josh Smith）。史密夫上季俾活塞裁走之後轉投火箭，仲幫球隊殺入西岸決賽，不過佢諗過度過，覺得再留喺火箭都係冇咩前途，所以拒絕咗張年薪250萬美元嘅約，只袋150萬美元嘅老將底薪爭霸。