張立基88歲高齡母親本周二（14日）在博愛醫院病逝，由於張立基懷疑有人失職導致母親離世，昨特地在博愛醫院召開記者會炮轟院方，哽咽要求召開死因聆訊，追查母親死亡真相。
今日48歲生日的張立基，昨在懷孕3個月女友Fiona陪同下見傳媒，一臉憔悴的他指母親上月26日因屙血尿而入住博愛醫院，初時精神不俗，直至本月7日突然瘦了一圈。他說：「姑娘話媽咪唔係好食得嘢，我問既然情況變差，點解唔做啲決定，例如吊鹽水咁，但冇人解釋我知。7月8號我探媽咪，情況仲差，冇晒知覺，我叫醫護人員睇媽咪，冇人理我，我好嬲，搵醫生，醫生診斷完先幫佢吊鹽水，之後媽咪有醒過，但唔知點解醫院冇做嘢保持住媽咪健康？醫生話媽咪年紀老，同埋之前咁多病，都係差唔多，我唔接受呢個解釋。」
「需要公平交代」
張立基指母親本來要插喉吸取百分百氧氣，但周一突然減少了百分之三十，他說：「醫護人員話唔想病人倚賴氧氣供應令體質變弱，當時媽咪心跳係135……7月14日媽咪就走咗……」說話至此張立基開始哽咽，之後他說：「7月14日氧氣cut到百分之五十，我好嬲，咁嚴重仲要cut？係咪有人嚴重錯失或者錯判？我要求召開死因聆訊，我唔接受媽咪係自然死亡呢個解釋，要解剖係對唔住媽咪，但我需要公平交代。如果法庭唔接受，我私人都會告。」
對於張立基投訴，博愛醫院昨回覆指病人上月29日入院，院方一直密切監察病人情況及提供診治，惟病人入院後情況沒有好轉，於7月14日下午離世。院方指有關個案已轉交死因裁判官跟進，並向家屬致深切慰問。
採訪：王連連
攝影：沈健程
