下周一係李小龍死忌，香港文化博物館展出李小龍最新系列藏品，展覽名為「賞．念李小龍」，展出200幾件李小龍相關物品，主要由美國三藩市收藏家陳振輝借出，當中有李小龍親筆簽名的初版《基本中國拳法》、唔同的海報、剪報、《唐山大兄》和《精武門》等電影宣傳片菲林，同埋《龍爭虎鬥》嘅幕後花絮照片同底片。
華僑睇《唐山大兄》自豪
展覽入面最特別嘅，就係150張李小龍電影《龍爭虎鬥》幕後花絮嘅底片，陳振輝話「大部份照片一般人未睇過」，咁呢批底片佢點得到呢？原來係佢喺1997年向華納電影公司借出李小龍唐裝收藏品，之後對方每年送10張原裝電影底片畀佢作回報，令佢有呢批咁珍貴藏品。
陳振輝自細喺三藩市長大，佢話細個受到歧視欺凌，到11歲有朋友畀佢睇李小龍封面雜誌，第一次接觸李小龍，就開始收集同佢有關嘅嘢，佢睇咗李小龍電影《唐山大兄》都令佢產生自豪感，擺脫華人喺當時社會嘅負面形象，更講到「唔同族裔嘅人因李小龍身為華人鼓舞」咁話。
李八方
mailto:[email protected]
