一個中等身高嘅男士，體重150磅叫做好標準，但對騎師嚟講，120磅已係重磅騎師，130磅更係災難可以收山。
前季香港冠軍騎師32歲嘅潘頓，就一直受體重困擾，大家咪睇潘頓去年同吳千語出席活動時大大啖食叉燒，以為佢好好口福，實則潘頓好易超出120磅，為咗控制體重，馬季內戒絕澱粉質，從不吃午餐，晚上只吃100克左右魚肉加蔬菜，一日只飲半杯約200毫升水，如果太口渴就濕吓口算數，而且又經常焗汗。
無疑潘頓咁操法，令自己前季贏112頭馬做冠軍，上季亦勝95 Win，但代價係搞壞身體，尿液太少生腎石，曾喺家內出現幻覺神智不清暈低，經常進出醫院造手術碎腎石，今年2月亦因背部劇痛，賽事期間倒下送院。
不過家陣唞暑，潘頓可否食多啲嘢呢？佢話以往唞暑畀身體「放假」係好事，但體重一升咗，要減番就好辛苦，加上今年暑期要去日本騎馬，所以仍要將磅位控制，幸好喺日本可以吃刺身、蔬菜，相信唔會太難捱。
相反華人騎師骨架較細，一般可以造120磅以下，冇乜體重困擾，其中已同靚女賽馬節目主持人阿Kit訂婚嘅梁家俊，暑期同阿Kit去峇里預支蜜月，佢話唔會食得特別多或特別少，亦毋須刻意減磅及過量運動，認真令潘頓羨慕。