建築邦不久前到美國旅行，橫跨東西兩岸，主要在兩大城市訪友探親，在紐約自不然係參觀大都會博物館，到百老匯睇舞台劇，在曼克頓行街領略街頭風情等，佢覺得紐約人步伐快如香港，嘈吵繁忙，香港人去到，一定適應，但紐約人係更有文化。呢一樣，過往曾蔭權做特首時，曾對傳媒講過，香港競爭紐倫港地位，只欠一樣，就係文化藝術區，所以佢力推西九文娛區，希望香港有劇院、音樂廳、藝術博物館，足以在亞洲稱雄，成為輔助香港金融中心之軟實力。可惜呢，曾先生由做政務司司長至到做完第二任特首，近十年時間，西九地皮仍然曬太陽。當時為何咁多文化界人士反對，要推倒重來，卒之搞到現在臨近爛尾邊緣，相信曾先生仍然不明不白。如果十年前就開始興建，邊度會有延期，大幅度超支之事吖。
建築邦去完紐約就去三藩市，租咗一架車暢遊Napa Valley與Silicon Valley，在三藩市坐地下鐵、電車遊市區，去到柏克萊，覺得非常方便，幾乎想留低唔返嚟，佢話三藩市生活節奏較慢，更悠閒，而且科技精英雲集，創意無窮，氣候又好，真福地也（只怕地震），三藩市不讓矽谷專美，近年湧現不少科技公司，如Twitter，最近又有Uber，都係「改變世界」之新興事業。Uber最近在香港引起的士行業抗議，但似乎已成為世界潮流，不可阻擋，建築邦話試過幾次在街上俾的士「揀客」拒載之後，佢真係想下載Uber，杯葛本港的士。
Uber呢間新興公司，創立唔算太耐，已引起華爾街注意，JP摩根大通近日宣佈職員可以因公事搭Uber的士，高盛在五月接納Uber為職員交通工具，摩根史丹利去年已有同樣宣佈。三間大行一齊歡迎Uber服務，必有所圖，梗係想盡早示好，預備爭奪Uber上市承銷權啦。當銀行家向新公司獻媚之時，新公司離IPO不遠矣。上個月過身嘅有名JP摩根賓架Jimmy Lee識得擦客戶鞋，出晒名，有一年通用汽車到訪JP摩根總部，占美．李特別安排將一架GM暢銷車擺放在大廈大堂。後來朱克伯格到訪，占美．李又唔着賓架制服（深色條狀西裝），改穿fb嘅運動衫在大廈門外迎賓，結果兩次都爭取到IPO生意。以咁嘅經驗睇，Uber好有機會成為fb之後最大嘅科技公司IPO，估值日日唔同，至少由500億美元起計，買晒全港的士牌，綽綽有餘。在21世紀，一夜之間，年輕人憑創意可以顛覆整個傳統工業！