上個月嘅政改表決因為建制派甩轆，令到建制派如箭在弦、準備向泛民發動嘅票債票償行動大失預算，其他梁粉組織亦被迫雪藏一段時間。不過聽日網上群組「support CY LEUNG」率先出動，發起力挺特首梁振英活動，莫非新一輪挺梁活動正式宣告來襲？
據報2013年2月成立嘅「support CY LEUNG」，聽日將會喺北角港鐵站B1出口擺檔，開宗明義叫做「撐CY街站」。地點係北角，喺嗰度搞撐梁振英活動，實唔怕被人狙擊。時間係下晝兩點開到5點，不過主辦單位似乎幾保守，只係預備咗500個「齊心」襟章，略嫌少咗啲囉。此外佢哋仲打算邀請市民寫啲祝福語喺心意卡，之後佢哋會連埋一張生日卡交畀梁振英。梁振英嘅生日係下個月12號，大大話話仲有差不多成個月，使唔使咁早賀壽呀？