唔知係咪發行都要唞暑，呢幾個禮拜嘅藍光碟又係冇乜睇頭，碟舖昌哥話近期較熱賣嘅，就係剛出演唱會BD嘅譚校長同葉麗儀，龍叔叔雖然係老餅，不過呢兩位都唔係龍叔叔杯茶，對早個幾星期出嘅《仙履奇緣》有feel好多。卡通片睇過無數次，1950年嘅古仔，同Air Jordan一樣到家陣都仲有不同版本，玻璃鞋同波鞋，出極都總有市場。當年嘅灰姑娘應該同米奇老鼠一樣，已係個七旬老人精喇。阿水都知古仔講乜，迪士尼呢次拍真人版，難度真係幾高，好在導演Kenneth Branagh拍過《哈利波特：消失的密室》同《雷神索爾》，對娛樂性同特技拿揑得幾好，保留到《仙履奇緣》經典情節之餘，亦加入唔少潮流元素，好似由惡死後底乸到Lily James飾演嘅公主，所有女人都係谷胸上陣，人哋咪一樣性感大方兼有美感，今次令𡃁仔都明白到，除咗樣貌要夠標緻致，原來身材都好重要，若果影碟版要裁到得番條頸，又或加塊布落心口遮遮掩掩，真人版電影一定悶到瞓着，咁就真係掉你塊布喇。
奧斯卡影后演活惡繼母
人大咗，對好多事物睇法都會有改變，幾廿年前嘅《仙履奇緣》，若由高登巴打去註釋，將會係一個「腳膠王子任性媾女」嘅故事，全城個個爭住試鞋，同個個周圍搵UNIQLO試身室條片一樣，炒到好不熱鬧。正所謂聽古唔好駁古，童話故事一向多bug，唔好問點解灰姑娘個老竇要娶個咁樣衰又唔溫柔嘅填房，亦唔好問點解全城幾十萬人，居然冇一個啱着對玻璃鞋等等，最緊要係睇得開開心心。Kenneth Branagh又真係拍得幾流暢，將惡繼母同兩個惡死哎吔阿妹，拍到要幾乞人憎有幾乞人憎，搞到龍嬸嬸同好多師奶一樣，邊睇邊鬧，睇得極為投入。
講番個繼母，由Catherine Elise Blanchett飾演，佢嘅演藝事業可謂勁到無倫，提名過無數大小影壇獎項，最勁一次係2013年憑《Blue Jasmine》拿下奧斯卡最佳女主角，扮起惡死後底乸不慍不火，嗰種厚顏偏私刻毒涼薄，發揮得淋漓盡致，叻過「人形龍蝦」多多聲。灰姑娘雖然頭一粒鐘都係受盡苦頭，不過最後嫁入王室有靚仔老公錫錫，學程卓端醫生話齋，一生拉勻嚟計都唔算好慘啦。
玻璃鞋變水晶鞋靚到喊
龍叔叔係「特技控」，對小仙女變出南瓜車一幕拍手稱讚，CG同音效相當到位，尤其係幫灰姑娘變出華麗晚裝時，畫面夢幻非常，再端出一對「水晶鞋」，灰姑娘對眼當堂睩到雞蛋咁大，冇錯，玻璃鞋由Swarovski打造，百分百係全水晶製，比透明無光澤嘅老舊玻璃鞋，實在漂亮得多，港女觀眾睇到呢幕必定狂呼大叫，恨得牙癢癢。
藍光碟畫質一向係迪士尼強項，加上無敵CG輔助，將天馬行空嘅童話故事表現得相當逼真，好多幕黑夜暗景都見到細緻位，而且喺華麗服飾同盛大場面，都表現到一份精細感，好睇過卡通版一萬倍，唯一可惜係冇3D。音響部份更要一讚，DTS-HD MA 7.1嘅環迴效果甚佳，舞會上嘅樂曲、幾十人格劍嘅清脆聲音、南瓜車趕路時嘅重低音等，都達到一級水準，提升咗唔少氣氛，加上仲有粵語配音，小朋友都啱睇啦。
編輯：謝慧珊
美術：楊永昌
龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
