利物浦喺周五進行亞洲之旅第二場熱身賽，去到澳洲作客出戰布里斯班獅吼。紅軍喺今夏密密收購球員，大部份新兵都喺呢場波正選上陣，結果由當中嘅占士米拿奠勝，以2:1反勝對手。領隊羅渣士嘅收購行動仲未完，球會同日向阿士東維拉畀3,250萬鎊（約四億港元）贖身費收購前鋒賓迪基，咁買法紅軍喺今夏買人使費又逼近一億鎊大關。
後防多甩漏先失守
利物浦喺周二以4:0大勝泰國明星隊，到周五對獅吼，羅渣士派出更多新兵擔任正選，奧歷治、丹尼艾格斯、占士米拿、約瑟高美斯同埋尼達利基尼全部擔正。紅軍今場波着啱啱展開宣傳嘅白色作客波衫出戰，喺開賽初段攻勢唔少，不過後防似乎就企唔穩陣腳，中堅馬馬度沙高喺比賽初段連環兩次蝦碌幾乎累事。到咗17分鐘紅軍終於失守，幾次都解唔到圍下，主隊中場柏拉杜斯接應隊友傳送，喺禁區對住紅軍兩個中堅射入。利物浦喺10分鐘之後扳成平手，拉爾拉拿見羅渣士咁睇重班新加盟球員，呢位上季新兵都要顯吓身價，禁區左路對住獅吼守將軒基特，兩三吓假腳甩開對手施射，個波彎入門將左邊網側，幫紅軍扳平，半場各一言和。
易邊後利物浦原陣出擊，但都係繼續有攻勢冇實際，到剩番半個鐘時間先作出調動。踢到75分鐘，終於由新兵占士米拿搞掂，喺中路接應扣過對手後快腳射入，奠定2:1勝局。
四億買斷賓迪基增攻力
紅軍嘅亞洲之旅仍進行緊，𠵱邊廂球會喺英格蘭就繼續進行增兵，預計好快就會再簽一位新兵。比利時前鋒賓迪基同維拉嘅合約有買斷條款，而利物浦亦決定畀呢筆3,250萬鎊嘅贖身費，好快會正式成為紅軍嘅球員。賓迪基𠵱家身在葡萄牙，預計會喺獲維拉放人後去做體測，隨即就飛去馬來西亞同新隊友會合，趕得切參與紅軍亞洲之旅最後一站賽事。
識睇，一定係睇足英台【英波Live】：
http://soccer.appledaily.com
http://bit.ly/engballlive