一單鉛水風波，令揭發事件嘅民主黨黃碧雲人氣急升，有分析認為，呢單嘢都有利白鴿黨嘅區議會選情，結果其他建制派都嚇到變熱鍋上嘅螞蟻，各自驗水抽水，仲攔路阻官，證明呢粒鉛水彈殺傷力好大。自詡「白宮發言人」的新聞統籌專員（Information Coordinator，IC）馮煒光怕且驚建制派選情受影響，噚日一早喺facebook「開工」，開闢鍵盤戰線，質疑黃碧雲拖延公佈「鉛水」超標嘅結果，但佢呢番幫拖卻惹嚟圍攻。
網民借力譴責元秋
IC噚日朝早先後4次轉載同一篇出自親政府報章、質疑最先踢爆鉛水事件嘅黃碧雲拖延公佈嘅報道，繼而同網民爆發罵戰。雖然黃碧雲喺報道詳細解釋，因為要覆檢而要遲啲公佈，但IC卻無視實際情況造謠生事，不斷重複留言要求黃「站出來，面對公眾」，又揶揄佢有份創立嘅白鴿黨「變成不敢面對公眾和記者」。
白鴿黨區議員柴文瀚見IC抹黑前黨友，留言反問：「為何政府不知？」、「政府是否因為涉及中國大陸外判商問題而隱瞞？」但IC卻不肯面對公眾，只係人肉錄音機上身要求黃「出來解釋」。有網民炮轟IC轉移視線，指民建聯蔣麗芸早於5月收到告密信，話全港15個屋邨食水可能含有不必要的重金屬，「明知有問題都唔去理，甚至專登阻人查可恥！馮煒光高調譴責蔣麗芸！請蔣麗芸解釋！」
黃碧雲：真的憤怒鳥
黃碧雲其後喺fb還拖，批評IC同建制派邏輯令人難以明白，坦言自己今次「真的憤怒鳥」。黃碧雲同時喺fb反駁同IC一樣質疑佢抽水嘅工程界立法會議員盧偉國，應自問「點解自己唔去查找行業內的問題，為甚麼不是由他去揭發鉛水事件，而是由民主黨去做」。有政界花生友笑言，查實IC有冇諗過，佢嘅「仗義幫拖」，分分鐘係為泛民主派送上選票呢？
識睇睇留言
PumpPump Ko：真有趣，政府樓驗到有鉛，責任竟在揭發者？不如索性以尋釁滋事罪拉佢（黃碧雲）坐監啦。
Joey Kong：我們的政府，不想解決人民提出的問題，老想解決提出問題的人民。
Chan Yu：原告變被告，相信只有無法無天的人，才講得出口。
Sammy Chan：最早知道是民協，民協一早通知房署，係房署唔回應咋，係咪應問房署做乜隱瞞？
資料來源：《蘋果》網頁
李八方
mailto:[email protected]