七月十二日為2014/15馬季最後一日賽期，沙田馬場有三萬八千零二十一人入場，雖然少於國際賽日，但因為夏日炎炎，烈日當空，大部份馬迷擠在室內躲避太陽，於是各餐廳、大堂內人頭湧湧，幾乎寸步難行，對馬會嚟講，構成一個「快樂的難題」，何況是日投注額達17億5千8百多萬元，全季總投注共1079億，係回歸後新高，比去季第一次突破一千億又高出5.8%，比十年前（2005/06）之低紀錄600億超出近80%，馬會唔高興先至奇。究竟十年之間，投注增加479億，錢從何而來？馬會冇公佈，但相信必定有一大嚿係跨境嘅銀両，人民幣兌港幣，馬場已經有專櫃服務啦。
當日有一位大馬主家族出馬之多，可能係一個紀錄，就係莎莎老闆郭少明家族，十一場出五隻，分別係變出美麗、美麗里程、牽動美麗、美麗大師與綻放美麗，不過成績一般，只得一場第二，一場第三，贏唔到頭馬。一位心水清馬迷對左丁山講：「記憶所及，蕭百君家族可能一日出馬曾經多過五隻，但因為蕭家啲馬名分澳斯卡、卡達鷹、勝哥兒、醉必勝等等等，一時唔記得咁多，唔似得郭家隻隻美麗，有個brand name，較容易上腦。」咁又係，莎莎專賣化妝品，美麗第一，用嚟做馬名，馬迷實記得到。
原來出版界亦有人記住郭少明做善事夠美麗，佢買咗一萬本「好聲」系列嘅有聲書本，送俾香港在老人院居住之長者及不同機構之弱視人士，令閱讀不便嘅老人能夠重溫若干經典。「好聲」係香港第一本集合全港「好聲」嘅有聲音書本，鬼才黃霑生前（2002年）曾講過：「我希望為香港留下最美麗動人的聲音」。電視、舞台製作人蕭潮順奉此理念，於2014年成立Wellfit e-Book，搜集過往「好聲」及本地著名「說書人」，用口述方式將本港書本名著變成聲音版本，向長者及傷健人士提供方便，用耳聽書。已經出版嘅有李我（夠經典喇啩）嘅天空小說「李我的天空」，搵羅家英、謝國璋、米雪、鄭詠梅讀「帝女花」，並由羅家英示範「演唱」，更有胡楓、南紅、羅蘭等人之「好聲美麗人生系列」，查良鏞先生慨允提供廣東話讀書版權，象徵式收版稅，令Wellfit可以推出「金庸系列」，蕭潮順於是不敢怠慢，搵陶傑（說書人）、謝君豪（郭靖）、黃杏秀（黃蓉）、劉雅麗（梅超風）、陳百祥（歐陽鋒）、葛民輝（周伯通）等等猛人一齊講射鵰英雄傳，一定聽出耳油。買呢啲「好聲」書本，旨在做善事，大家呢幾日遊書展，不妨到「好聲」攤位望吓聽吓。