怪醫梁家騮曾經以自己正職係醫生，議員只係兼職嚟回應被批評立法會出席率低，睇嚟佢未來會更加忙於正職，因為佢投資咗幾百萬開一間新嘅內視鏡中心，除咗自己會落手落腳幫病人照鏡，仲邀請緊名醫加盟。
怪醫自從離開醫管局後，喺名醫雲集嘅中環太子大廈開檔。佢話今次再喺中環開一間內視鏡中心，因為自己對照鏡好有興趣，希望可以好似日本專家咁，照胃鏡技術嚴謹同準確度高，又可以做多啲早期胃癌研究。市民對私營市場嘅照腸鏡胃鏡服務有需求，好多病人以至保險公司，都唔鍾意入院照鏡。
拒開財會唔陪拉布
八方問怪醫係唔係會專心搵錢，下屆立法會唔競逐連任？佢笑住話唔會公開討論呢個問題，已經私下同醫療界朋友討論過。佢話呢幾日佢唔出席財委會，同醫生工作忙無關，係因為撥款已經變成政治問題，一個議題拆開做十幾個，無可能陪拉布。