有「體壇奧斯卡」之稱嘅ESPY頒獎禮周三喺洛杉磯舉行，喺上個NBA球季光芒四射嘅勇士控衞史堤芬居里（Stephen Curry），細女Ryan前幾日出世後果然繼續旺，個人獨攬兩個獎項，威過自稱「聯盟第一」嘅勒邦占士（LeBron James）。
最「美」女足好養眼
上季做咗常規賽MVP兼帶領球隊贏總冠軍嘅居里，除咗當選最佳NBA球員之外，仲贏埋最佳男運動員呢個大獎；居里嘅手下敗將「大帝」勒邦占士，只係得個最佳決賽表現獎嚟自我安慰一下。至於最佳教練獎，當然係勇士主教練卡爾（Steve Kerr）贏出啦。
不過，教練同球員加埋擸咗三個獎嘅勇士，去到最佳隊伍獎就飲恨嘞，輸咗畀捧走女子世盃嘅美國女子足球隊；不過，美國女足嘅奪冠之路真係無懈可擊，所以呢班「勇士」都話輸得心服口服。平時喺球場上英姿颯颯嘅女足代表都好尊重場合，着到靚一靚先上台攞獎，非常養眼。
至於最佳國際運動員呢個榮譽，都係離唔開足球界兩位球王之爭。巴塞隆拿嘅阿根廷球王美斯，就力壓老對手基斯坦奴朗拿度當選，令到後者唔能夠冧莊。除咗以上幾位國際球星，「格鬥女王」露絲都係呢晚嘅風雲人物，除咗成為最佳女運動員，仲打低「不敗拳王」美韋達，獲選為最佳拳手。
