樓南光前日忽然喺fb上載一個巴士車長嘅相話:「唉！攞住背包，孭住套球桿，叫呢位車長開門俾我上，佢諗咗30秒！上車仲對住我講粗口！哈哈哈哈！你都(到)退休嘅年纪啦！……提早啦……！」另外仲附圖有車長個名以及職員編號，咁樣會唔會造成網絡欺凌，引嚟網民討論。
昨日樓南光出席電影《男極探射燈》嘅開鏡拜神儀式，佢在場表示:「我都唔係第1次攞Golf棍搭巴士，我好聲氣叫司機開門， 佢望咗我廿幾秒，佢淨係開右邊門，我話上唔到，佢話我係唔乜想開俾你，我話你唔好咁嘅態度，我影佢，佢叫我企定啲，佢好興，想再鬧再衝出嚟，講一大輪粗口。」
對於係唔係樓南光嘅行李體積過大，而引發司機嘅行為，樓南光話:「我攞嘅係細套棍，我錯咗咪sorry囉，我冇諗過facebook講幾句會咁大件事，啲人話唔好搞欺凌，就當係大家一時之氣，我自己有車咁啱冇揸，都係自己唔好，我怕坐唔跳錶的士，所以我揀坐巴士、地鐵。」
對於樓南光將司機姓名同樣貌po上網，被批評係網上欺凌，樓南光話:「我都勸大家唔好，我係第1次，亦係最後1次，對唔住，原來咁易造成網上欺凌，如果得罪咗對方、搞到佢冇咗份工，我講sorry，因為只係我片面之詞，勸各位網友收手。」雖然呼籲網民「收手」，但至今樓南光仍然未有刪圖。