一場股災後，A股出現空前增持潮，大家學識咗「自己股票自己撐」嘅意義，估唔到連利豐（494）榮譽主席馮國經都明白呢個道理！
聯交所資料披露，馮國經本周二出手增持537.2萬股利豐，每股平均價5.944元，涉及3,193萬元。
查實馮國經由7月7日開始至今，已經第4次出手，7月9日、即係港股一度暴瀉逾二千點嘅股災翌日，都有大手買貨，累計一個半星期，已經齊頭增持2,000萬股，即係掟咗接近1.2億元出嚟掃貨，持股量由30%增至30.23%。
利豐股價由今年3月中至今，已經狂跌近三成，唱淡利豐不遺餘力嘅瑞銀上月底又叫沽，下調目標價至4.5元，較現價仲要低24%。馮國經大手增持係咪成功撈底就不得而知，但跌市當前，抗衡淡友撐自己公司，的確唔做唔得，可惜呢2,000萬股嘅平均價要5.97元，利豐噚日收5.95元，佢賬面蝕緊囉。