內地星期三公佈第二季同上半年GDP增長數據，成功保到七之餘，好過市場預期，對於呢個數，中港股市就以下跌嚟回應，英國《金融時報》直頭發文質疑，搞到官媒《新華社》要發文還擊，話水份唔夠0.5個百分點，無1到2個百分點咁多云云。
事實上，發展中國家呢類型嘅溝水，又點只中國一個，印度亦都喺今年初改GDP計算方法，令到2013至2014年度嘅GDP增長由4.7%向上修訂至6.9%。
從阿爺嘅角度睇，其實今次公佈經濟據都幾煩，公佈個數好，又俾人話滲水，個數唔好又驚會刺激到個市嘅弱小心靈，結果公佈個好嘅數，啲投資者又覺得阿爺唔使再救市，無咗升市動力，個市又跌過，搞到啲官媒又要出口術穩住個市。
過去幾次，官方經濟數據出台前後，阿爺都會向準經濟較弱環節施救，與其爭論一個連官媒都認係有水份嘅數字，又有乜意思？不如留意吓數據較弱嘅環節，搵番相關嘅嘢落注，好似前晚阿爺出手撐外貿，出口股咪升得幾好，畢竟經過今次救市之後，日後支撐股市嘅仍然係實際經濟，落藥都會重手啲。
流氓