劉皇發囝囝劉業強接任鄉議局主席一職後，據知近日頻頻「落鄉」，到鄉議局轄下27條鄉聽取村民意見，與此同時，有關佢同副主席張學明不和嘅傳聞開始傳出，甚至有傳有人想推張學明出年爭立法會嘅鄉議局功能組別，而張學明被問及此事不置可否，似乎鄉議局嚟緊有好戲睇。
花生友聽聞，最新一單不和事件喺前日發生，有傳劉業強同張學明到八鄉聽取村民意見時，有村民唔妥張學明，質疑佢身為行會成員，但連村民爭取擴闊荃錦公路一事多年都未成功，覺得張學明失職。有消息話張學明向村民解畫時，慨嘆喺行會只得一票，但行會有成15個人，所以有時好難反映到村民意見；最精采一幕則係張學明據聞面對村民連串炮轟時，搬出菜園村事件為自己護航，話自己過去曾擺平菜園村，但言論卻遭同場嘅劉業強駁斥，強仔話喎：「呢單嘢係我爸爸做，邊係佢（張學明）做？」火藥味甚濃。
消息話，強仔上任後信晒自己嘅軍師班底，唔多聽張學明呢啲元老意見，係佢哋不和嘅導火線。最近鄉議局喺有成15個位嘅區議會增選委員上嘅提名，據聞強仔亦非常唔畀面，將張學明原本提名嘅工程師劉志成同林祿榮，縮減至一個，擺明要同前輩大鬥法。
張學明回覆花生友查詢時，就指與劉業強冇不和，指前日會上冇發表過有關行會同菜園村言論，形容有關傳聞只係「得啖笑」。至於區議會增選委員提名問題，張學明就指純粹係覺得劉志成身為工程師，較適合代表鄉議局出任委員，所以將原本獲鄉議局通過出任委員嘅林祿榮，轉為由劉志成出任喎。
花生友