申訴專員公署噚日公佈政府部門「金草莓」獎，最多人投訴部門繼續係房屋署同食環署喺度爭，上年攞第二嘅房署今年終於問鼎榜首，以483宗投訴力壓排第二、只得352宗投訴嘅食環署。排第三、四、五分別係地政總署、運輸署同屋宇署，三個都係長期得主；消委會首次上榜排第八，近來好濕滯嘅水務署同入境處就排第九同十，上年有份嘅民政事務總署同醫管局跌出榜外。
被問到齊齊捲入「鉛案」嘅房署同水務署成日上榜，係咪表現特別差？申訴專員劉燕卿Connie好客氣咁話，因為有啲部門工作對外，自然容易收到投訴，透露收到巿民投訴鉛水事件，但唔可以透露詳情。至於佢嘅舊東家消委會首次上榜，Connie話已經申報利益，所有涉及消委會嘅投訴都冇過佢手。