將於明日退休前休假、同工作咗38年嘅廉署say goodbye嘅副廉政專員黃世照噚日同傳媒茶敍，雖則臨別秋波，但佢話唔需要畀忠告年輕一代嘅廉署人員，因為廉署嘅廉潔自治、公平公正、依法辦事嘅核心價值同文化早已植根，佢相信年輕一代廉署人員可以秉承呢個核心價值。佢亦無錦囊畀候任副廉政專員李寶蘭，「佢（李）經驗豐富，我同（廉政）專員都相信佢能力同質素可以帶領執行處」。
被問及退休大計，黃Sir話冇收到邀請出任公職，佢亦希望退休後過平淡生活，擺多啲時間打最愛嘅羽毛球，「放下工作擔子，享受平淡生活，打多啲羽毛球，做多啲運動」。