退出公民黨兼辭任立法會議員嘅湯家驊，未來集中火力搞佢創辦嘅智庫「民主思路」，仲搵到中原地產創辦人施永青加盟做榮譽顧問。施老闆喺記者會話，認同香港要壯大中間力量而加入，但未係正式成員，要觀望3個月至半年後先決定，但拍心口會出錢出力，喺金錢上資助民主思路；至於佢有份組成嘅政改民意關注組都會另組平台，有報道話會改名「未來@HK」，施老闆承認係成員之一。
湯狀話搵施老闆幫拖，唔止講錢，而係商界係社會重要持份者，但民主思路確係資金緊絀，早前喺炮台山租咗個900呎地方做辦公室，已經欠緊銀行錢，要努力撲水，希望搵到3年營運資金，佢強調接受捐助係冇前設。民主思路未來半年會約見唔同政黨、佔領後新湧現嘅團體等，探討包括研判重啟政改時機等議題。下星期則同律政司司長袁國強見面，但未有計劃上京或者約見特首梁振英。