【銅鑼灣】袁詠儀（靚靚）和張智霖（Chilam）由拍拖到結婚已有23個年頭，二人感情有增無減，早前他們拍內地真人騷節目，除了全程晒恩愛，更到韓國補拍婚照。兩公婆對快將九歲的囝囝張慕童（魔童）更加是錫到燶，魔童越大越似爹哋Chilam，相當俊俏。
靚靚早前要在內地拍劇集《領養》，連Chilam在澳門舉行的演唱會都未能捧場。不過劇集上周煞科後，靚靚即急急返港陪老公和囝囝，日前記者於銅鑼灣發現靚靚、Chilam兩公婆帶魔童去食午飯後離開。
趕住二人世界
當日大約下午2時，記者見到Chilam一家三口在利園外等司機，其間魔童突然狂施嗲功嗲Chilam，除了在他身邊團團轉，又將整個人挨在Chilam身邊典來典去，魔童見爹哋冇反應，轉去嗲媽咪靚靚，靚靚即擁着他𠱁了幾句，其後司機駕七人車到，兩公婆便送魔童上車，他們再自行離去。
此時，Chilam發現記者影相，素顏的靚靚表情雖然有點尷尬，但仍笑笑口不介意記者拍照，還與老公十指緊扣地返回利園到停車場攞車，sweet到爆！另外，靚靚前日在微博上載與鬚根look的Chilam的大頭合照，並留言稱「啟動假期節奏」，相信他們是結伴出埠。
採訪、攝影：徐錦池
