莎莎國際（178）舊年純利跌一成，掌櫃陸楷嘅人工亦唔見一截。根據莎莎最新年報，陸楷舊年全年袋907.8萬元，大幅下跌46%，主要因為佢收取以股份為基礎嘅薪酬部份減55%。
市場一向知道，陸楷嘅現金薪金一向唔高，佢主要透過行使購股權再沽貨套現，再有另一筆收入落袋，2013年下半年佢就不停行使購股權，然後沽貨套現過千萬元。舊年莎莎業績麻麻哋，陸楷舊年嘅基本薪金維持318萬元，冇花紅分，真係一蚊酌情獎金都冇，而佢收取股份為基礎嘅部份，約值567萬元，較前年減少55%。
大股東郭少明兩夫婦嘅薪酬情況就維持不變，各自有廿幾萬元花紅分，總薪酬分別係329萬同埋299萬元，不過佢哋有股息收，舊年就收息4.32億元，區區幾百萬人工算得乜。