足球是圓的，所以，自己國歌自己噓。有錯嗎？國歌含鉛，最愛國無私奉獻嗰位師奶，夠薑當做飲歌嗎？
水是鉛的，犯咗法又點喎，小五女生都知，飲咗鉛水又點喎，政府無人知。政府總部，個個飲樽裝水！（佔領運動期間，跨部門政府記招公開承認的。）
汽油都揀無鉛的今日，公屋食水竟然含鉛，個水喉匠又含冤控訴政府老屈。到底，鉛是何物，直教生死相許？（直教生仔相當困難，響應政府生五個，五個都飲鉛水，做硬廢青！）
那家中國建築，絕不認錯救市。股民嚇到嘔黃膽水，即刻擲貨，公安高速出招拉人，控告惡意沽空。在香港，沒子彈，別吶喊啊！（暴力拆喉、勇武前留意身邊有無七俠五義，或者警隊的鉛水砲車。）
懸浮粒子，政府當睇唔到。鉛水管裝置，屬預製組件，政府摸不着，只好搵一個水喉佬祭旗。等埋發叔，祖國建築，食水甩轆，聽一鑊熟。梁特開始發功了，負責掃街的林鄭完了，肯蹚這鉛水的，只得禮賓府養的龍蝦！