7月9日公安介入股市維穩，當晚公佈已鎖定十幾個在7月8日大跌市中，惡意造空藍籌的機構和個人，至今冇下文。噚日《華夏時報》刊登「惡意造空無間道」文章，透露公安部副部長孟慶豐已帶隊到上海，調查個別貿易公司涉嫌操縱期指價格。
文章分析，呢啲貿易公司將境外熱錢，以虛假貿易方式滙入內地，再開期指造淡。不單惡意造空，仲引狼入室，裏通外國，簡直罪大惡極。證據？文章提出數據，話上半年有1.6萬億元貿易順差，但中國出口低迷，呢啲錢肯定係流入股市。
其實就算有熱錢流入，可以造淡亦可造好，但而家有政治任務，公安砌得就砌。有唔少股民網上留言鬧爆身為國家隊的國壽，口頭話要增持，但又偷偷減持中信證券A股，才是真正造空無間道！
黃尹華