縱橫遊太子女袁愷瑩（Jessica）愛旅行，更愛工作，已育有一子一女的她，依然一早起床照顧子女起居上學，之後便忙着返工，雖然打理的是父親創立的生意，但她卻比一般人落力，原因是父親從小的教育「一得一失，nothing is perfect！總之要勤力！」從小受父親耳濡目染下，Jessica愛上旅行，每年最少一次的家庭遊，近月她更將最愛的郵輪旅程拓展成新項目，娛人娛己。
撰文：羅慧敏
袁愷瑩是縱橫遊創辦人袁士強孻女，於英國西敏寺大學心理學士畢業後，曾經任職保險，婚後主力相夫教子，已育有一子一女的她，去年決意重返職場，主要是因為小朋友已開始長大，可以騰出時間工作，但照顧一對子女，Jessica堅持每事親力親為，她說：「𠵱家小朋友返朝八晚五，我都想出返嚟做嘢，幫爸爸手。我樣樣嘢都會自己做，每日朝早煮早餐，送返學，接放學，幫佢哋溫習功課，我都會自己做，工人姐姐就輔助。」
三分天才七分努力
Jessica為父親打理江山，目前Jessica是縱橫遊業務拓展經理，今年她更初試啼聲，首次為公司引入Diamond Princess郵輪旅行團項目，現時主力為該項目任統籌，她說：「自從上年同爸爸一家人上迪士尼號，親身坐過，感覺係同以前去旅行好唔同，以為七日會好悶，但係我去到最後一日已經唔捨得走，其實喺郵輪上面一啲都唔悶，可以好忙、好多嘢做，佢會埋岸，日日都會落船，等同一間流動酒店，可以一次過去十個八個地方，嗰次真係覺得好舒服、好開心，尤其是family tour，大家可能食飯嘅時候先會見到，原來郵輪對family bonding係好好，好集中一個地方，大家做埋同一樣嘢。」
Jessica續說：「之後就更加積極咁研究，我哋公司係走開日本，所以都想搵返同日本有關聯嘅郵輪去做，郵輪上面有溫泉，走高貴少少，要多少少luxury人客，我哋重質，唔係重量。」替父親打工，會否感到壓力？她說：「冇嘅，壓力係嚟自工作，而唔係屋企人畀，離開公司都會講公事，但係爸爸好畀心機教我哋，爹哋教我哋，做人唔可以唔做嘢，佢成日教我哋一得一失，得到啲嘢一定會失去啲嘢，意思係nothing is perfect！總之要勤力，『三分天才，七分努力』，爸爸唔畀懶，我到𠵱家都有個習慣，就係每個星期六，都會定晒下星期嘅行程，就算𠵱家小朋友嘅時間表都一樣，不過就由我去幫佢哋編排。」
