平日經常譴責示威者暴力唔理性嘅民建聯，前晚喺水務處官員落區葵聯邨、就部份水辦驗出食水含鉛量超標事件解畫後，多名成員突然包圍官員車輛。其中一名肥仔更情緒激動喪鬧官員，民記立法會議員陳恒鑌見狀即上前隔開。
對於有人事後聲稱該名肥仔係居民，同場嘅白鴿黨社區主任劉肇恒就向八方踢爆，話呢位肥仔同一日下晝，先喺葵聯邨着住民建聯件制服擺街站，平日經常出入民記議辦，對民記上演「自己人㩒住自己人」一幕感奇怪，亦對於民記平日經常鬧人暴力同激進，自己又包圍官員車輛，深感騎呢。陳恒鑌同八方證實嗰位白衣男係民記義工，當時見官員唔肯解釋，激動到攔車，佢上前安撫，完全唔係做媒示威。