【本報訊】宏安（1222）長沙灣「牙籤樓」薈悅有驚喜！資深驗樓師詹濟南「詹sir」日前驗收一個「一眼睇晒」的開放式間隔單位，收樓質素佳，全屋4處小瑕疵，最蝦碌是廚櫃漏了遮蓋通渠口的生口板，不涉結構，評分93分，屬優良。
驗樓獲優良評級
業主去年3月花約390萬元買入薈悅中層戶，實用281方呎，日前邀約詹sir驗樓。他走進廚房驗來去水，突然說：「走咗雞，漏咗生口板喎！」所謂「生口板」，是廚櫃遮蓋通渠口的木板，當鋅盆或洗衣機去水喉栓塞，打開通渠口，使用以通渠藤或者通渠水。
廚房及浴室來去水無問題，露台趟門採用雙重防水設計，屋外打風落雨也不怕，詹sir總結：「手工唔錯，係啲濕碎嘢，例如地板有一塊裂咗，油漆好靚，好少見油漆可以攞滿分，計落有93分，屬優良評級。」
單位的骰，實地度尺，大廳長16呎9吋、闊8呎5吋，廳房合一。若睡床置於近露台位，僅餘2呎多作通道，兼對廚房及廁所。若床置於近大門，空間雖見使，惟失驚無神開門會被嚇親。
項目現有約5個放租盤，叫租最平為中層B室，實用281方呎，叫租1.4萬元，呎租50元。