柴灣青年廣場噚日慶祝5周年，呢個場由新世界發展（017）旗下新世界設施負責管理，新世界主席鄭家純派出三仔鄭志明做代表，青年事務委員會主席劉鳴煒亦畀面出席。劉鳴煒呢日冇再發表偉論，成個活動冇發表演說，影完大合照、跟鄭志明握手道賀之後，逗留一粒鐘多啲，未完場就急急腳走人。
不過，噚日係中學文憑試（DSE）放榜，劉鳴煒臨走前都有醒學生兩句，認為學生與家長都唔需要太過心急或者興奮，皆因取得唔同成績都可以有好好嘅出路，應該用更多時間分析消化後，先至作出更好嘅決定。
作為富三代嘅鄭志明亦都話，自己當年讀書成績僅算中上，「自己都冇7A、6A、5A」，勉勵同學「讀書唔係一切，最緊要就係試新嘢」。