港大民研計劃總監鍾庭耀囡囡鍾昊藍，原來都係今年DSE考生，噚日放榜，成績中上，有兩科5**、一科5*及三科5級佳績，連最擔心嘅中文科都考到3級，大學門券在握。
盼用文藝研究社會科學
昊藍話大學聯招首選係爸爸所讀嘅港大社會科學系，但唔好以為咁樣係要「女承父業」，昊藍自己解畫，話自己喜歡思考，亦對藝術有興趣，所以希望用文藝方式研究社會科學，但唔係想搞民調，重申選報港大呢個系，只有三成係受父親影響。
鍾庭耀同太太噚日都到昊藍就讀嘅港大同學會書院陪佢放榜。鍾庭耀曾經擔心昊藍中文科成績，見到佢考到大學入學最低要求，終可放下心頭大石。阿女唔繼承民調衣鉢，佢唔失望，並予以支持，「好多家長想小朋友叻、想佢好、想佢事業有成，但如果真係要選擇，邊樣係最重要呢？我覺得做一個好人係最重要」。