中證監上個禮拜落order，所有A股上市公司都要為股價維穩，股東增持、回購股票、高層增持、股權激勵、員工持股，五個選擇中至少做一樣來撐股價。有啲公司好畀面，大股東真係攞錢出來增持；但亦有唔少公司竟然夠膽只買100股（內地最低買一手），攞區區幾千蚊就當交咗差。
阿爺唔准大股東沽貨，又逼人買股票，唔少老細當然有怨氣。但佢哋唔敢出聲，只好搞笑式買100股來宣洩不滿。有內地媒體統計，至今有20家A股公司發出通告，話高層已經買咗100股，以滿足中證監維穩要求，金額最低的只有996元人仔。
但亦有公司好土豪咁增持，騰邦國際大老闆除咗真金白銀大手增持外，仲呼籲員工掃貨，如果有損失佢負責包底。效果立竿見影，公司股價比上個禮拜低位彈咗五成！
黃尹華